चुनौ की बार एग्ये......

गौं-गौंऊँ माँ फयेर लँगत्यार लगीग्ये।
एगे  फेर  देखा  चुनौ  की बार एग्ये।।
नई नई छविं बात, छौरा सब रँगमत।
हाथ जोड़ी नेतों की फयेर डार एग्ये।।

दीदा बौ तें  फयेर  गौं की  याद एग्ये।
एग्ये फयेर देखा चुनौ की बार एग्ये।।
बौजी उलरया और काकी मायालु ह्वे।
चौक डींडयाल्यु मां  मौल्यार  एग्ये।।

भैरों, नरसिंग, नागर्जा फयेर याद एग्ये।
एग्ये  फयेर  देखा  चुनौ की बार एग्ये।।
घँडुळी अज्यलूं थान-थानू मां बजदी।
थानों मां थरप्यां दयब्तौं की याद एग्ये।।

म्वारी कु गुंगनाट जिकुड़ी रुझांण लेगीग्ये।
एग्ये  फयेर  देखा  चुनौ  की  बार  एग्ये।।
धारो  की  पांणी  अर बुड्यों  की  बांणी।
मन  तैं  सबुका  फयेर  रिझांण  लेगीग्ये।।

गौं- गौंऊँ माँ मन्खयूं की लँगत्यार लगीग्ये।
एगे  फेर  गौं मां देखा  चुनौ  की बार एग्ये।।